What a gwaan people? Hope everybody did have a good week. Link me pon hotgalcherry@hotmail.com OR www.twitter.com/hotgalcherry OR TEXT (mi naw ansah NO call) 382-2187. Some a oonu jus nuh get di point when mi say, THE STAR and the email address and the Twitter wha me give oonu ah di only place oonu can reach me. Me nuh operate under a next name and mi nuh write fi nobody else but THE STAR. And yuh see if me really press di issue an find out say a particular person a tek money from people an operate a business and a pretend fi be me, we go done yuh inna di column like a big dutty truck tyre ah drive ova one centipede. TRY KNOW DAT.

Some Ah Oonu Questions Answered:

Reader: Miss Cherry it look like Queen Ifrica an Tony Rebel have someting going on. But anuh nuttn cauz Rasta got soul.

Me: Haha. But what a waaaay yuh all up inna di people dem thing. Lawd have mercy. Hahaha.

Reader: How di FIWI choice girls dem mek di stylist a do dem so? It nuh look good! It nah happen.

Me: Yuh know say mi nuh too watch di program from di Indian girl headside did shave out like worm wha nyam out lettuce. But it look like summen really wrong wid how dem start look because yuh a di third person who text een a complain. Me haffi go tune een an really see wha oonu a talk bout.

Reader: How di school teachas dem wey ago up ina age an it show pan dem face a gwan like dem younga den di young girls an a gwaan so pon Facebook, dem fi calm.

Me: Ok then. Bitter much ...

Reader: Lisa glad for what happen cause har name a get call for dat more dan di songs she did. Jam dung a get too open-minded to all dese tings. Dem a creep up pon we.

Me: Ah me fi tell yuh! Fi har name get called di most outta all di broken female (careers) from dat camp. And ah nuh fi di right talent pon di mic. Haha.

Reader: Love di comments. Article shot. Yuh can help me sign a petition fi hear Raga (show) inna Port Antonio please.

Me: Raga, sort out di people dem so dem can hear yuh program. Mi nuh know ah wha happen to di radio frequency or wha. Sort it out.

Alright! Suss time people!

MI HOPE AH LIE TO BACKFOOT

Mi hear say Zebra breed a girl in Hanover while him did deh pon bail and she ah say it was a one-night stand. Now people, talk di truth wha God love, di Bible say yuh muss love yuh neighbah as yuhself, but hear wha, Zebra live up di road, roun di corner, ovah di ditch, across di river, across from one meadow from me. Him ah nuh fi me neighbah! People ah di fuss mi go really talk an mi nuh care wha nobody waah fi say.

People fi have standards! Lawd gaaawd! Zebra cudda come back inna di next life as SOAP AND WATA! Mi NAW use it! Mi prefer stink an' dutty an' wipe mi body wid poison ivy, dan fi go near him! People, ah good ting ah di people dem good, good decent paper mi write fah, becawz mi wudda really tell oonu di tings dem pon mi mind. Mi nuh care, if ah one night stand, half night stand, one minute stand or table stand, too much man deh a road fi go DEH so willingly.

GYPTIAN NOT NOMINATED. SURPRISE, SURPRISE.

Gyptian

Mi nuh undastand how people surprised say Gyptian album nevah get nominated fi a Grammy. Nuff ah oonu nevah even know say di man have one album and not just a single, so tap oonu noise. Him an' di company ah push di one song, Hold Yuh, how long now and him did release Naw Let Go and it naw kick off inna di international market, dem nuh move on. Dem still a push Hold Yuh like no odda song nuh deh pon di album. Di local people dem who deh kick up say him shudda get nominated because Hold Yuh did shot, ah nuh so it work.

Di nominating committee ah go nominate people based pon di body of work pon di album. So if dem nuh feel say it up to scratch wid di res' a man dem like Buju and Gregory Isaacs, wha yuh go do except go back to di drawing board an try improve? Di category is called Best Reggae Album, not Best Reggae Single. Some ah di same industry people who a cuss, ah di same people dem who say dem a boycott di record label an naw voice none ah dem artiste. Dat mek sense? An den yuh go cuss an say di nominating committee full a pure old people so dats why Gyppie and odda young artistes neva get nominated. If oonu work wid di artiste dem an' produce quality track aftah track fi go pon a album, not only will more of di artistes be able fi cross ovah, but yuh go start see some new names inna di Grammy nominations. So if yuh naw contribute to di cause, have a seat an tap di noise.

CONGRATS TO BUJU

Mi jus waah tek dis time and space to say big up to Mark 'Buju Banton' Myrie pon him Grammy nomination. Me nuh know who else inna di music industry, INNA DI WORLD, did have a rough year like him and still manage fi a push tru. Di January 16 concert inna Miami ah go be him first concert since aaaaall ah dis, an mi nuh haffi ask if it go cork. And truss me, mi ah fly out fi see it.

Buju

BEFORE MI FORGET...

Mystic, mi get couple texts pon deh matter here. People ah ask yuh fi stop "eeek" pon twitter and a send dem Blackberry message and a put "eeek" inna it. Dem find it annoyin. Mi nuh know if dem naw say it to yuh or if dem a tell me fi mek it a public appeal. But yeah we know yuh highly excited, but dem a ask yuh fi cut out di "eeek" and stop send late night and early morning broadcasts. Mi really wudden know. Mi a follow yuh pon twitter, but mi use di "mute" option so yuh nuh show up inna mi timeline. But dat a dem message, so me a deliver it.

Big up oonuself: Macka Breast, C Jay, Sexie Shorty, Malouda and di whole Slipazz Lane family inna Moneague, St. Ann, Sue Ann Goodaz, Kimesha Wright and di whole SVS High School and Shenelle and Shavelle aka Lad and everybody from Bull Sav, Tina and Shemar, Slim from Berta Lane, Nat, Stacy and