TRIAL AND CROSSES INDEED

Mi a tell oonu say from di twin dem put out deh CD deh wha name 'Trial and Crosses', a pure ah dat a find dem. Hear wha, oonu need fi ask Vegas permission fi name oonu nex' CD 'A Just Di Blessings' cause maybe dat will change oonu luck. First oonu haffi a wage campaign bout oonu innocence aftah dem hawl oonu go a jail. Den when oonu go jail nobaddy naw listen to oonu concerns. Den fi top it off dem drive up car nex' to oonu cell a play oonu CD bout jail and deh dead wid laugh aftah oonu.

Now, oonu travel aaaall di waaaay from Kingston fi go St Mary fi 'Fully Loaded' and di security dem say dem naw let oonu een cause dem get special order fi lock oonu out. No sah! Oonu need a premium wash off and 'Ultra Powerful Oil of Mek Dem Like Wi' cause two people cyaan have drama so!

WHA YUH A BAWL FAH?

Sharon Burke - File

Sharon mi hear say aftah di Fully Loaded fiasco wid Killa deh cuss yuh off pon stage and Matterhorn tell yuh fi gweh when him go on, yuh siddung rounah back a bawl. But mi need fi undastand why? Look how much years yuh inna di bizniz, yet yuh nuh organise yuh ting as 'solid' as yuh claim?

Ah always some bangarang and everybody a run roun' like headless chicken. Now people, if all artiste, who people claim ah di wuss set a people fi wuk wid a complain, mi feel it serious. No proppa stage management nevah deh deh, di security all a hassle Killa, not to mention every year di overseas artiste dem an clash segment a go more an more dung di drain.

I LOVE THIS CITY

Smaddy can please tell mi if summen wrong wid Toni Braxton? It bad enuf say she hold on to di mic when she an Etana a perform an wudden let it go fi Etana sing when her mic stop wuk, so dem kindly tek off Etana. But when dis woman a go bawl out say she jus "love di city of Jamaica" mi feel a time fi check if all is well wid har.

Nobaddy cudden clue har een before she step offa di plane say a one different country she a go, an wha di country name? Bwoy, is a good ting nobaddy roun har nevah mention say dem a 'mek a run go dung a country' and happen fi mention say di country name St. Elizabeth or whatevah, cause oonuh know say she wudda tink a one totally different island!

Den di nex' saga a wid dem a introduce har to di minister of tourism. She when deh have one conversation bout her father who is a (church) minister an ting and it so happen dat dem introduce her to our (government) minister. So she buss out, "Oh you're a minister too?" People, smaddy can please sponsor dis woman a clue? One religion name 'tourism'? She can sing, but bwoy mi nuh know who brighter: she or one feather.

ADDI GET SERIOUS

Kartel yuh outta control wid yuh search fi attention. Mi rate yuh skills but stop di foolishness. Wha yuh new song wid Kim Gaza or Gaza Kim or Kim Gully Gaza or whatsoevah really fah? It necessary fi do one song bout one big tuff kin man and one high school pickney who breed fi him?

And if di song did sorrowful it wudden bad! But di song a celebrate di fac' say oonu inna one relationship and she breed. Yuh a go outta yuh way fi get some prime time. So because a dat, mi a go ask people fi fully ignore yuh cause wi see wha yuh a come wid already.

Yuh jus a look fi a way fi people get furious and di song mek headlines and it get banned so yuh can cuss. But why? Cause a nuh like it sound good neidah. Some tings like Rampin' Shop and di drama wha it cause sometimes ongle come along once. Hush. Jus kindly move along and accept it.

Mi feel a time yuh tek some time and go inna some garrison an pree some people wid serious issues and come again, cause a one topic yuh deh pon fi every song a try get some hype. Yes wi get it, yuh love woman and wi muss ignore di Jeffery Hype tattoo.

Latah massive.