Once upon a time, Anancy tink to himself seh dat if him coulda collect up all de common-sense ina de worl an keep it fi himself, den him boun to get plenty money an plenty powah, for everybody woulda haffi come to him wid dem worries an him woulda charge dem very dear wen him advise them.

Anacy start fi collect up and collect up all de common-sense him could a fine an put dem inna one big-bag calabash. When him search an search an couldn't fine no more common-sense Anacy decide fi hide him calabash full a common-sense pon de top of a high-high tree which part nobody coulda reach it.

So Anancy tie a rope round de neck a de calabash an tie de two end a de rope togedda, an tie de rope roun him neck so dat de calabash wasa res pon him belly. Anancy start fi climb up de high-high tree, which part him was gwine hide de calabash, but him couldn't climb too good nor too fas for de calabash wasa get in him way everytime him try fi climb.

Anancy try an try so till all of a sudden him hear a voice buss out a laugh backa him, an wen him look him see a lickle bwoy a stan up a de tree root an a laugh an halla seh, "What a fool-fool man! If yuh want to climb a tree front ways, why yuh don't put de calabash behine yuh?"

Well sah, Anancy soh bext fi hear dat big piece a common-sense come outa de mout a such a lickle bit a bwoy afta him did tink dat him collect all de common-sense in de worl, dat Anancy grab off de calabash from roun him neck an fling it dung a tree root, an de calabash bruck up in minces an de common-sense dem scatter out ina de breeze all ovah de worl an everybody get a lickle bit a common-sense.

Is Anancy mek it.
Jack Mandora, me nuh choose none.