Today they continues the popular Mus Buss column. In this weekly song review feature, three musical minds with different tastes will analyse each song and will grade it on vocal ability, lyrics, musical arrangement and appeal. Songs that make the grade will be dubbed 'Mus Buss', while songs that flop they will be dumped in the 'Caan Buss' bin.

This week the muss buss/cyaan buss team will be reviewing Mavado's Don't Worry.

Witch: "Bwoy mi nuh know if Mavado tink him a God yuh know, cause mi a get one priestly vibe on dis when him seh 'every thugs mus confess to me', a who him tink him be?"

Lady Boo: "A so mos' gangsta tink still, everybody seem to tink dem a sort of warlord."

X Factor: "Yuh see it. But den again di yute dem weh round him come in like dem worship him. If dem waan mek him feel like him a God den him have a right to tink it."

Lady Boo: "But none of dem nah buy him record. Dem only listen to it when dem a drive pas'."

X Factor: "Dem can't afford to buy it."

Witch: "My problem wid Mavado has always been di violence lyrics. While nuff people rate di violence ting mi nuh like it cause it nah contribute much to di people/music. Di song seh even if him lef di gully don't worry. But so what if him lef di gully? Him a really help dem?"

Lady Boo: "If dem haffi listen di music when him a drive pas' den obviously not."

X Factor: "Dem haffi listen di music when him drive pas'? Mi neva kno dat."

Witch: "Mi love di riddim still, DASECA dem a di boss! Dem riddim dem just dark and haunting, yuh really hear di keyboards."

Lady Boo: "Di flow of di song good still, him nuh sound like him overdo it. But him really sound like him believe him a God."

X Factor: "Yeah a mean di riddim bad still. An even how Mavado flow on it, it alrite because it come in like DASECA and Mavado dem have a kinda chemistry going on."

Witch: "One ting though Mavado always a do di same kinda song, di same theme and di same haunting sad tunes. Him caan do sumting else for a change?"

X Factor: "Di man a sing wha him a live, if dats all him know den dats all him can sing about."

Witch: "God forbid when him life experiences done!"

Lady Boo: "It mus buss still."

Witch: "Bwoy anyting Mavado touch tun gold still, di yute dem love him even if him tell dem bout dem parts dem woulda seh 'yeah'...so it a go buss."

X Factor: "Yeah mi feel like it a go get a buss caus right now Mavado a di man still. Every tune weh him do di people dem respond positively to it."