What a gwaan massive? Bwoy mi have some senior joke fi share; but nuh yet, truss mi. Lawd, tank di Lord di week done! One more day of stress wudda too much! But as mi say, later fi dat. Kaboom, big up yuhself, nuh say nuttin; Mucho Mucho to di flippin worl, a dat wi say; TAE, Witch and di ress a di INK massive, big up oonu self! Santa Cruz; Magnum Massive; Zip crew, di whole a oonu bless up!

Tonight, Amazon Nightclub inna Santa Cruz wi a say. It's oh so 'Loaded' wid Busy Signal di Star artiste of the Month! Him a come tru and sign some autograph an party an ting, but it nuh dat simple, so bless up di police and di parish council fi dem cooperation pon Busy entrance inna di plaza an club. We cyan gi whe di surprise an ting. Ice, wha yuh say, a you dat? Danca Bling, Collo Squad, ZJ Capone raae! Chi Ching mi hear say fi tonight inna di club Kaboom a dress yuh up inna diamond studded bulletproof vest! Lawd Gawd! But nuh worry, she carry one Sheriff costume come gimme wid di whole a mi assets exposed! Have mercy. Mi husband muss guard mi like soldier di whole night! Link me pon hotgalcherry@hotmail.com. Suss time.

Di Two Fren Dem Fall Out

 

But a cudda wha dis a gwaan wid dem two yah? Nah sah! Mi say smaddy email mi di letter wha di ex-road manager write in response to di whole drama, bout say a dem fire him and all dat, and mi did haffi share di joke, so mi email it to Kaboom. Lawd! Massive, mi nah lie, him couldn't a mek up dem ting deh and have so much reference point. Him a cuss say fi one month a only likkle ovah four gran dem pay him and him two pickney dem a suffer cause a it.

Him one deggeh Adidas shoes when deh tear out and it start laugh inna di wind, so a him woman sorry fi him and buy him one next shoes. Fi one a dem video shoot a him haffi a go look props and spend it outta fi him money, den haffi dash back rounah di video shoot fi go sweep garbage fi di set clean and pure tings. More time dem a cuss him say him mean cause him nuh buy liquor fi dem. Mi a tell yuh! Den fi dem solution to dem (ex) friend is dat him muss go deh wid one rich woman cause a dat dem do. IFFF dem ting yah go so... what a wicked set! Anyway, him and dem part ways now. What a saga!

WHY THE DEBATE?

Mi really nuh understand wha di debate fah bout who mek 'Nuh Lingah'. Ova Mars from long time say a fi dem ting and dats why people start email me aftah Stone Love gi Ding Dong dancer of the year or whatsoever. Dem a say certain tings bout di man. Now mi nuh know how true dat be, but is juss a joke and reference point people always a mek inna dancehall circles. From mi did hear di saga how much months ago, mi mek mi talk inna di column. Mi nuh know how dem a go trademark dem dance, cause mi nuh know if dat even possible. Cause dem can always go copyright di name, but how yuh copyrite a dance? Yuh haffi videotape it and put dat inna file too. But as mi say, people a go always a fight ova dem ting deh, cause as humans we always waah lef an "I was 'ere" mark pon di worl.

KIDNAPPING ON THE RISE

Massive, wha really a gwaan wid dem kidnapping and rape inna di country? Is a form of protest or wha? It juss get mad a way! Couple week ago mi hear a talk mek say dem a target certain school and area; mi nevah call no name cause mi nevah sure an mi nevah waah dem actually start target di people dem, if nuttin nevah go so. But mi vex an crazily fra** when mi a hear dem ting yah a gwaan inna di country and some people all dem can debate bout a who really fire which board and why. Nah sah! bigger ting a gwaan inna di country! Heeeelp! A dat wi say! Heeeelp! Wi a get kidnap an suffer like dawg! Massive as mi did say, mek a note of which taxi oonu a go inna, and text di plate to oonu family AND friends. It serious a way!

GANGSTER BOY OR GIRL?

Massive, when lass none a oonu hear or see di Gangster woman? She very very pregnant sah. Truss mi, it look like a pregnancy alone can calm dung some a dem catty yah. Before dat she juss all ovah di place a send email and write message and cuss like she nuh have nuttin fi do. Oh yeah, a dat, she nevah have nuttin fi do fi real. Is a boy or girl she a have? Well mi wish har all di best. Ress a massive, tek care and memba say P** an dawg nuh have di same luck so wrap up di ting.